"Top Cop" (2026) කියන්නේ මුල ඉඳන් අන්තිම වෙනකම්ම කුතුහලයෙන් එක දිගටම බලන්න පුළුවන්, මරු මිනීමැරුම් අභිරහස් (Murder Mystery) පන්ජාබි ෆිල්ම් එකක්. කතාව පටන් ගන්නේ හැමෝම සතුටින් සමරන ලොකු මංගල උත්සවයකින්. හැබැයි එක පාරටම ඒ සතුට නැති වෙලා යනවා. ඒකට හේතුව තමයි මනමාලිගේ යාළුවෙක් වෙන, ලන්ඩන්වල ඉඳන් ආපු මැන්ඩි (Mandy) කියන කෙල්ල බැල්කනියෙන් වැටිලා මැරෙන එක. මුලින්ම හැමෝම හිතන්නේ මේක තමන් විසින්ම කරගත්තු සියදිවි නසාගැනීමක් කියලා. හැබැයි මේ කේස් එක විමර්ශනය කරන්න ජේ.ජේ. සිං (JJ Singh) කියන දක්ෂ, ප්රවීණ පොලිස් නිලධාරියා ආවට පස්සේ තමයි වැඩේ වෙනස් වෙන්නේ. එයා මැන්ඩි වැටිලා හිටපු විදිය බලලා, මේක සියදිවි නසාගැනීමක් නෙවෙයි, ප්ලෑන් කරලා කරපු මිනීමැරුමක් කියලා හොයාගන්නවා. ඊටපස්සේ තමයි නියම සෙල්ලම පටන් ගන්නේ. එතන හිටපු සැකකරුවන් 20කට වඩා වැඩි ප්රමාණයක් පොලිසියේ ලැයිස්තුවට ඇතුළත් වෙනවා. මැන්ඩිගේ වර්තමාන සැමියා වන ජර්මන්, මැන්ඩි කෙරෙහි මාරම ආසාවකින් හිටපු ගුචී වගේම මනමාලිත් මේ සැකකරුවන් අතර ඉන්නවා. ඒ විතරක් නෙවෙයි, මැන්ඩි මැරිලා තියෙන්නේ උසකින් වැටුණු නිසා විතරක් නෙවෙයි, ඇගේ ඇඟ ඇතුලේ දරුණු වස වර්ගයකුත් තිබිලා කියලා පෝස්ට්මෝටම් රිපෝට් එකෙන් හෙළි වෙනවා. ඉතින් මේ වස දුන්නේ කවුද? මංගල උත්සවයට ආපු හැමෝම තමන්ගේ අඳුරු රහස් හංගගෙන බොරු කියද්දී, දක්ෂ පොලිස් නිලධාරියා සැබෑ ඝාතකයාව කොටු කරගන්නේ කොහොමද කියලා කතාව බලලම දැනගන්න පුළුවන්. මෙහි ප්රධාන පොලිස් නිලධාරියාගේ චරිතයට සුප්රකට පන්ජාබි නළුවෙක් වෙන ගුර්ප්රීට් ගුගී (Gurpreet Ghuggi) මරු විදියට රංගනයෙන් දායක වෙනවා. පැය 1යි විනාඩි 49ක ධාවන කාලයක් තියෙන මේ ෆිල්ම් එක, සස්පෙන්ස් සහ ක්රයිම් ෆිල්ම්ස් බලන්න ආස අයට කිසිම කම්මැලිකමක් නැතුව එක හුස්මට බලන්න පුළුවන් පට්ටම සිනමා නිර්මාණයක්!
"Mudbron" (2026) කියන්නේ හොල්මන්, අද්භූත වගේම ත්රාසජනක චිත්රපට බලන්න ආස කරන අයට මරු චීන (Chinese Horror/Thriller) ෆිල්ම් එකක්. ආදරණීය සැමියෙක් තමන්ගේ බිරිඳ වෙනුවෙන් කරන ලොකු සටනක් වටා තමයි මේ මුළු කතාවම ගෙතෙන්නේ. කතාව පැත්තට හැරුණොත්, මෙහි ඉන්නේ මාරම ආදරයෙන් ජීවත් වෙන සැමියෙක් සහ බිරිඳක්. මේ බිරිඳ ඉන්නේ ගැබ් අරගෙනයි. ඉතින් මේ දෙන්නගේ එකම හීනය තමයි තමන්ට හම්බවෙන්න ඉන්න දරුවාට හොඳට උගන්වලා, සමාජයේ හොඳ කෙනෙක් විදියට හදාගන්න එක. හැබැයි මේ පවුලේ තියෙන සතුට හිතාගන්නවත් බැරි විදියට එක පාරටම නැතිවෙලා යනවා. මේ බිරිඳගේ සැමියා කරන්නේ වීඩියෝ ගේම්ස් හදන (Video Game Developer) රක්ෂාවක්. එයා වැඩ කරන සමාගමෙන් මෙයාට අලුත් ව්යාපෘතියක් බාර දෙනවා. ඒක ඇවිත් අද්භූත සිදුවීම් මාලාවක් ගැන ලියවුණු ගේම් එකක්. ඉතින් මේ ගේම් එක ගැන නිදහසේ හිතලා ලියන්න ඕනේ නිසා, මෙයා ඒකට අදාළ බඩු බාහිරාදිය ඔක්කොම තමන්ගේ ගෙදරට අරගෙන එනවා. හැබැයි මේ අද්භූත දේවල් ගෙදරට ගෙනාවට පස්සේ ටික දවසක් යද්දී ගෙදර පරිසරය සම්පූර්ණයෙන්ම වෙනස් වෙන්න ගන්නවා. ඒ අස්සේ සැමියා දකිනවා තමන්ගේ ආදරණීය බිරිඳගේ හැසිරීමත් මාරම අමුතු විදියට වෙනස් වෙනවා කියලා. හරියට ඇයව කවුරුහරි පාලනය කරනවා වගේ. ඉතින් මේ නිවසට ඇති වෙච්ච කරදරය මොකක්ද? බිරිඳගේ ඇඟට ඇතුළු වෙලා ඉන්න ඒ අදෘශ්යමාන බලවේගය කාගේද? සැමියාට තමන්ගේ බිරිඳවයි, කුස ඇතුළේ ඉන්න දරුවවයි මේ යක්ෂයන්ගෙන් බේරගන්න පුළුවන් වෙයිද කියන එක තමයි කතාව පුරාම තියෙන්නේ. කුතුහලය වගේම මරු ත්රාසජනක ගතියක් තියෙන මේ චීන චිත්රපටය IMDb දර්ශකයේ 5.7/10 ක අගයක් ගන්න සමත් වෙලා තියෙනවා. හොල්මන් සහ සස්පෙන්ස් ෆිල්ම්ස් බලන්න ආස අයට කම්මැලිකමක් නැතුව එක දිගටම බලන්න පුළුවන් සුපිරිම ෆිල්ම් එකක් තමයි මේක!
"Janur Ireng" (2025) කියන්නේ හොල්මන් සහ අද්භූත ෆිල්ම් බලන්න ආස කරන අයට මරු ඉන්දුනීසියානු බියකරු (Horror/Thriller) චිත්රපටයක්. 2023 අවුරුද්දේ ලෝකෙම වගේම ලංකාවෙත් ගොඩක් අය ආසාවෙන් බලපු, සුපිරිම "Sewu Dino" ෆිල්ම් එක ඔයාට මතක ඇති. අන්න ඒ කතාවේ ආරම්භය, ඒ කියන්නේ ඒ හැමදේටම අවුරුදු හයකට කලින් වුණු අඳුරු සිදුවීම් ටික තමයි මේ චිත්රපටයෙන් බලාගන්න පුළුවන් වෙන්නේ. මේ කතාව දිගහැරෙන්නේ 1997 අවුරුද්දේදී. සබ්දෝ (Sabdo) සහ ඉන්ටන (Intan) කියන සහෝදරයා සහ සහෝදරියට තමන්ගේ තාත්තා නැතිවුණාට පස්සේ ජීවත් වෙන්න මාරම කට්ටක් කන්න සිද්ධ වෙනවා. ඔහොම ඉද්දි දවසක් මෙයාලගේ ගෙදර වත්තට කළු එළුවෙකුගේ ඔළුවක් ගෙනත් දාලා තියෙනවා වගේ හිතාගන්න බැරි අමුතු හොල්මන් වැඩ වෙන්න ගන්නවා. ඒ මදිවට හදිසියේම මෙයාලගේ ගෙදරත් ගිනි අරන් සම්පූර්ණයෙන්ම පිච්චිලා යනවා. අන්තිමට කිසිම පිහිටක් නැතුව පාරට වැටුණු මේ සහෝදරයයි සහෝදරියවයි හොයාගෙන, එයාලගේ තාත්තාගේ අයියා වෙන අර්ජෝ කුන්කෝරෝ (Arjo Kuncoro) එනවා. එයා මාරම සල්ලි තියෙන සල්ලිකාරයෙක්. ඉතින් එයා සබ්දෝ සහ ඉන්ටන් දෙන්නව තමන්ගේ මහා මන්දිරයට එක්කගෙන යනවා. හැබැයි මේ ලොකු මන්දිරයේ තියෙන සැප ජීවිතය පිටිපස්සේ හැංගිලා තියෙන්නේ ලේ ගඳ ගහන අඳුරු රහසක්. ඒ වගේම දරුණු හදි හූනියම් සහ බලි තොවිල් (Black Magic) ශාපයක් මේ පවුල පස්සෙන් එනවා. නංගි වෙන ඉන්ටන්ට මේ මන්දිරයේ තියෙන අමුතු ගතිය මුලින්ම තේරෙන්න ගන්නවා. ටිකෙන් ටික මේ දරුණු කළු මායාවේ ශාපය මුළු පවුලම එක එක විදියට බිලිගන්න හැටි මාරම බියකරු විදියට මේ ෆිල්ම් එකෙන් බලාගන්න පුළුවන්. හොල්මන් සහ අද්භූත කතාවලට ආස අයට නම් මේක නියම ෆිල්ම් එකක්!
"Godari Gattupaina" (2026) කියන්නේ හිතට මාරම නිදහසක් දෙන, ආදරයයි පවුලේ බැඳීම් ගැනයි කියවෙන ලස්සන තෙළිඟු ෆිල්ම් එකක්. දකුණු ඉන්දීය ගම්මානවල තියෙන ලස්සන පරිසරය එක්කම තමයි මේ මුළු කතාවම හැඩවෙලා තියෙන්නේ. කතාව පැත්තට හැරුණොත්, ගෝදාවරි ගඟ අයිනේ තියෙන ලස්සන ගමක ජීවත් වෙන හිත හොඳ ත්රීවීල් ඩ්රයිවර් කෙනෙක් වටා තමයි මේක ගෙතෙන්නේ. මෙයාට අහම්බෙන් මුණගැහෙන ලස්සන කොලේජ් යන කෙල්ලෙක් එක්ක ආදරයක් ඇති වෙනවා. මේ දෙන්නගේ ආදරය මාරම සරලයි, ඒ වගේම හරිම සුන්දරයි. හැබැයි කෙල්ලගේ තාත්තාට තමන්ගේ දුව ගැන ලොකු බලාපොරොත්තු තියෙනවා. ඉතින් මේ තාත්තාගේ දැඩි නීති රීති වගේම සමාජ මට්ටම් නිසා මේ දෙන්නගේ ආදර කතාවට නොහිතපු ප්රශ්න ගොඩකට මුහුණ දෙන්න සිද්ධ වෙනවා. මේ හැමදේම මැද්දෙන් මුන් දෙන්නගේ ආදරයට මොකද වෙන්නේ කියන එක තමයි ෆිල්ම් එකේ තියෙන්නේ. මෙහි ත්රීවීල් ඩ්රයිවර්ගේ චරිතය කරන්නේ සුමන්ත් ප්රභාස් (Sumanth Prabhas) කියන නළුවා. එයා මාරම තාත්වික විදියට ඒ වැඩේ කරලා තියෙනවා. එයාගේ පෙම්වතිය විදියට නිධි ප්රදීප් (Nidhi Pradeep) කියන නිළිය රංගනයෙන් දායක වෙනවා. කෙල්ලගේ තාත්තාගේ චරිතය කරන්නේ ප්රසිද්ධ නළුවෙක් වෙන ජගපති බාබු (Jagapathi Babu). එයාගේ රංගනය නිසා මුළු ෆිල්ම් එකටම මරු ගැම්මෙක් ලැබිලා තියෙනවා. මේ ෆිල්ම් එකේ බහුතරයක් දර්ශන ස්වභාවික ගම්මානවලම රූගත කරලා තියෙන නිසා දෘශ්ය අතින් මාරම ලස්සනයි. IMDb එකේ 6.8/10 ක් වගේ මාරම ඉහළ රේටින්ග්ස් ප්රමාණයක් මේකට ලැබිලා තියෙනවා. කිසිම අසභ්ය දර්ශනයක් නැති නිසා නිවාඩු වෙලාවක පවුලේ හැමෝටම එකට වාඩි වෙලා සතුටින් බලන්න පුළුවන් පට්ටම ෆිල්ම් එකක් විදියට මේක හඳුන්වන්න පුළුවන්.
"Marmaduke" (2022) කියන්නේ ගෙදර ඉන්න පොඩි ළමයින්ට කම්මැලිකමක් නැතුව බලන්න පුළුවන් ලස්සන ඇනිමේෂන් කාටූන් ෆිල්ම් එකක්. සත්තුන්ට ආස කරන අයට මේක තවත් විශේෂයි. මේ කතාවේ ඉන්නේ Marmaduke කියලා මාරම ලොකු බල්ලෙක්. ඇඟෙන් ලොකු වුණාට මෙයා හිතින් හරිම පොඩි එකෙක් වගේ. ඒ වගේම මාරම දඟයි. එයාගේ පවුලේ අය එයාට ගොඩක් ආදරේ කලත්, මෙයා කරන දඟවැඩ නිසා ඒ හැමෝටම නිතරම එක එක කරදරවලට මුහුණ දෙන්න සිද්ධ වෙනවා. දවසක් මෙයා පවුලේ සාදයක් අස්සේ කරපු පිස්සු වැඩක වීඩියෝ එකක් ඉන්ටර්නෙට් එකට ගිහින් හැමතැනම වයිරල් වෙනවා. මේ වීඩියෝ එක දකින ලෝක ප්රසිද්ධ සුනඛ පුහුණුකරුවෙක් වෙන ගයි හිල්ටන්ට හිතුණා මේ බල්ලව ලෝක ශූරයෙක් කරන්න පුළුවන් කියලා. ඉතින් එයා Marmaduke ව පුහුණු කරන්න බාරගන්නවා. හැබැයි මේ බල්ලා මාරම කම්මැලි කෙනෙක්. ඉතින් මේ වගේ දඟකාර, කම්මැලි බල්ලෙකුට ඇත්තටම ලෝක ශූරයෙක් වෙන්න පුළුවන් වෙයිද කියන එක තමයි කතාව පුරාම තියෙන්නේ. ඇත්තම කිව්වොත් මේ ෆිල්ම් එකේ ඇනිමේෂන් කොලිටි එක නම් ගොඩක්ම ඉහළ මට්ටමක නෑ. ඒ නිසාම විචාරකයන්ගෙන් මේකට ලැබිලා තියෙන්නේ සෑහෙන්න අඩු රේටින්ග්ස් ප්රමාණයක්. හැබැයි කුඩා ළමයින්ව සතුටු කරන්න හදපු එකක් නිසා, මේකේ තියෙන විහිළු වැඩ ටික පොඩි අයට නම් මාර විනෝදජනක වෙයි. මේ චිත්රපටයේ Marmaduke ගේ චරිතයට හොලිවුඩයේ ප්රසිද්ධ නළුවෙක් වෙන පීට් ඩේවිඩ්සන් (Pete Davidson) හඬකැවීමෙන් දායක වෙනවා. ඊට අමතරව ජේ. කේ. සිමන්ස් (J.K. Simmons) වැනි දක්ෂ නළු නිළියන් රැසක් මේකට එකතු වෙලා ඉන්නවා. ඉතින් රේටින්ග්ස් ගැන වැඩිය හිතන්නේ නැතුව, නිවාඩු වෙලාවක ගෙදර ඉන්න පොඩි අයත් එක්ක එකතු වෙලා සතුටින් බලන්න පුළුවන් සරල, ලස්සන ෆිල්ම් එකක් විදියට මේක හඳුන්වන්න පුළුවන්.
"Hitpig!" (2024) කියන්නේ පවුලේ හැමෝටම එකට වාඩි වෙලා,හිනාවෙවී බලන්න පුළුවන් පට්ටම ලස්සන ඇනිමේෂන් කාටූන් ෆිල්ම් එකක්. මේ කතාවේ ප්රධාන චරිතය තමයි හිට්පිග් කියන ඌරා. මෙයා කරන්නේ අයිතිකාරයන්ගෙන් පැනලා යන සත්තුන්ව සල්ලිවලට අල්ලලා දෙන එක. මෙයා මේ වැඩේට මාරම කෙළෙක්. ඔහොම ඉද්දි දවසක් මෙයාට ලීපින් ලෝඩ් කියන පිස්සු ඩයල් එකෙන් මාර ලොකු කොන්ත්රාත්තුවක් ලැබෙනවා. ඒ තමයි එයාගෙන් පැනලා ගිය පිකල්ස් කියන අලි පැටියව ආපහු අල්ලලා දෙන්න. මේ වැඩේ කරලා දුන්නොත් හිට්පිග්ට ඩොලර් මිලියනයක ලොකු සල්ලියක් හම්බවෙනවා. හැබැයි මේ පිකල්ස් කියන අලියා මාරම අහිංසක, හැමතිස්සෙම සින්දු කියාගෙන සතුටින් ඉන්න දඟකාර සතෙක්. එයාගේ ලොකුම හීනය තමයි කොහොමහරි තමන්ගේ පවුලේ අයව හොයාගෙන ඉන්දියාවට යන එක. ඉතින් සල්ලිවලට මේ අලි පැටියව අල්ලන්න යන හිට්පිග්ට, මුළු ගමන පුරාවටම පිකල්ස් එක්ක ඉන්න ලැබුණාම නොහිතපු විදියේ මරු යාළුකමක් ඇතිවෙනවා. මුලදී සල්ලි ගැන විතරක් හිතපු හිට්පිග්, පස්සේ පිකල්ස්ගේ අහිංසකකම දැකලා එයාගේ හිත ඇතුළෙන් මාර විදියට පස්සට ගහනවා. එක පැත්තකින් තමන්ගේ බාරගත්තු රාජකාරිය, අනෙක් පැත්තෙන් තමන්ගේ හොඳම යාළුවා. අන්තිමට හිට්පිග් අර මිලියන ගාණක සල්ලි ඔක්කොම පැත්තක දාලා, තමන්ගේ ජීවිතේ පවා අවදානමේ දාලා පිකල්ස්ව බේරගන්න සුපිරි ගේමක් ගහනවා. විනාඩි 85ක් වගේ පොඩි වෙලාවකින් ඉවරවෙන මේ ෆිල්ම් එකේ හඬකැවීම් කරලා තියෙන්නෙත් ජේසන් සුඩෙයිකිස් වගේම ලිලී සිං වගේ ප්රසිද්ධ අයයි. පොඩි අයට විතරක් නෙවෙයි, ලොකු අයටත් කිසිම කම්මැලිකමක් නැතුව එක දිගටම බලලා, අන්තිමට ලස්සන ආදර්ශයකුත් ගන්න පුළුවන් නියම ෆිල්ම් එකක් තමයි මේක!
