තමන්ගේ දෙමාපියන්ගේ ලොකු ලොකු බලාපොරොත්තු සහ හීනවලට කරගහන්න බැරුව, ඉගෙනීමටත් එතරම් දක්ෂතාවයක් නැතිව, තමන්ගේ පාඩුවේ සැහැල්ලුවෙන් ජීවත් වෙන්න උත්සාහ කරන පිරිමි ළමයින් කණ්ඩායමක් දෙස සමාජය සහ පවුලේ අය "වැඩකට නැති අපතයන්" ලෙස බලන ආකාරයත්, ඔවුන් මුහුණ දෙන සැබෑ ජීවන අත්දැකීමත් තේමා කරගත්තු අපූරු මලයාලම් සිනමාපටයක් තමයි "Vaazha: Biopic of a Billion Boys" කියන්නේ. 2024 වර්ෂයේ අගෝස්තු 15 වෙනිදා තිරගත වුණු, විනාඩි 125ක් පුරා දිවෙන මේ නිර්මාණය Comedy සහ Drama ශානරයන්ට අයත් වන අතර IMDb දර්ශකයේ 6.6ක ඉතාමත් හොඳ ප්රේක්ෂක අගයක් ලබාගෙන තිබෙනවා. මෑත කාලයේ දකුණු ඉන්දීය සිනමාවේ අතිශය ජනප්රිය වුණු "Jaya Jaya Jaya Jaya Hey" සහ "Guruvayoor Ambalanadayil" වැනි චිත්රපට අධ්යක්ෂණය කළ විපින් දාස් (Vipin Das) විසින් මෙහි තිර රචනය සිදු කර ඇති අතර, ආනන්ද් මෙනන් (Anand Menen) විසින් මෙය අධ්යක්ෂණය කර තිබෙනවා. කතාව පැත්තට හැරුණොත්, මෙහි ප්රධාන චරිත වෙන්නේ කුඩා කල සිටම එකට හැදෙන, නිතරම එකට ගැවසෙන යොවුන් මිතුරන් පස්දෙනෙකු වටායි. පාසල් වියේ සිටම ඉගෙනීමට දුර්වල, නන්නත්තාරේ ඇවිදින මේ මිතුරන් කණ්ඩායම දෙස ඔවුන්ගේ දෙමාපියන් බලන්නේ දැඩි කලකිරීමකිනුයි. සමාජයෙන් සහ පවුලෙන් එල්ල වන නිරන්තර පීඩනය, අසල්වාසීන්ගේ සරදම් මැද වුවද මොවුන් තමන්ගේ ජීවිතයේ සතුට සොයායන්න උත්සාහ කරනවා. නමුත් ඔවුන් තාරුණ්යයට එළඹෙත්ම, ජීවිතයේ වගකීම් සහ රැකියා සොයාගැනීමේ අභියෝගයන්ට මුහුණ දීමට සිදුවන අවස්ථාවේදී ඔවුන් මුහුණ දෙන මානසික හැලහැප්පීම්, පියවරුන් සහ පුතුන් අතර ඇතිවන සංවේදී ගැටුම් මෙහි ඉතාමත් අපූරුවට දිගහැරෙනවා. සිජු සනී (Siju Sunny), අමිත් මෝහන් (Amith Mohan) සහ ජොයිමන් ජෝතිර් (Joemon Jyothir) වැනි නවක යොවුන් නළු පිරිසකගේ තාත්වික රංගනය මෙහි ඇති ප්රධානම ශක්තිය වන අතර, ප්රසිද්ධ නළු බේසිල් ජෝසප් (Basil Joseph) ද මෙහි සුවිශේෂී චරිතයකින් රංගනයෙන් දායක වෙනවා. යොවුන් වියේ පසුවන ඕනෑම පිරිමි ළමයෙකුට තමන්ගේම ජීවිතය තිරය මත දකින්නාක් වැනි හැඟීමක් ඇති කරවන මෙහි, මුල සිට අගටම බඩ අල්ලාගෙන හිනාවෙන්න පුළුවන් ජවනිකා රැසක් අඩංගු වන අතරම, අවසාන භාගයේදී පවුලේ බැඳීම් ගැන සිතා ඇහැට කඳුළක් උනන විදියේ සංවේදී බවක්ද ගැබ්ව තිබෙනවා. සැහැල්ලුවෙන් රසවිඳින්න පුළුවන්, තාරුණ්යයේ නියම හැඩය පෙන්වන හොඳ මලයාලම් සිනමා නිර්මාණයක් සොයන අයට මේක කියාපු තේරීමක්.
