වාහනයකින් පැමිණෙන තරුණ යුවළක්, අතීතයේ දරුණු මිනීමැරුම් රැසක් සිදුවුණු පාළු මන්දිරයක් අසල නතර වන දර්ශනයකින් තමයි මේ මුළු කතාවම ඇඟ හීතල කරමින් ආරම්භ වෙන්නේ. ඔවුන් ඒ පාලු නිවසේ රැඳී සිටින මොහොතක, එහි ඇති පැරණි දුරකථනයකට ඇමතුමක් ලැබෙන අතර, අනෙක් පසින් ඇසෙන්නේ ප්රේක්ෂකයන්ට හොඳටම හුරුපුරුදු Ghostface ගේ ඒ බියකරු හඬයි. මුලදී මෙය කවුරුන් හෝ කරන විහිළුවක් ලෙස සිතා ඔවුන් සුපුරුදු ප්රශ්නවලට පිළිතුරු දුන්නත්, එකපාරටම නිවස ඇතුළත සැරිසරන මිනීමරුවාව තරුණියගේ ඇස ගැටෙනවා. බියෙන් සලිත වන ඇය මේ බව තම පෙම්වතාට පැවසුවද, ඔහු පරීක්ෂා කර බැලීමේදී පෙනී යන්නේ එය සංවේදක (Sensors) මඟින් ක්රියාත්මක වන කෘතිම රූපයක් පමණක් බවයි. එය තවත් එක් සෙල්ලමක් යැයි සිතා ඔවුන් සිනාසෙනවාත් සමඟම, කිසිසේත්ම බලාපොරොත්තු නොවන අයුරින් සැබෑ Ghostface මිනීමරුවා ඔවුන් ඉදිරියේ පෙනී සිටින්නේ මුළු වටපිටාවම ලේ විලක් බවට හරවමිනි. අවසානයේදී ඒ අහිංසක යුවළ දරුණු ලෙස ඝාතනය කර, මුළු නිවසටම ගිනි තබා මිනීමරුවා එතැනින් පළා යනවා. හොරර් සිනමාවේ අතිශය ජනප්රිය සන්නාමයක නවතම දිගහැරුම වන "Scream 7" සිනමාපටය, මෙවැනි දරුණු ආරම්භයකින් පසුව තත්පරයෙන් තත්පරය කුතුහලය (Mystery) සහ භීතිය උපරිමයෙන්ම පවත්වාගෙන යන්න සමත් වී තිබෙනවා. පසුගිය පෙබරවාරි මාසයේදී තිරගත වුණු, මිනිත්තු 114ක ධාවන කාලයකින් යුතු මේ චිත්රපටයේ මෙවර ප්රධානතම ඉලක්කය වෙන්නේ සුපුරුදු පරිදි සිඩ්නි ප්රෙස්කොට් (Sidney Prescott). මේ සුපිරි චරිතය වෙනුවෙන් ප්රවීණ නිළි නීව් කැම්බල් (Neve Campbell) නැවතත් රංගනයෙන් එකතු වීම රසිකයන්ට ලොකු සතුටක්. හැබැයි මෙදා පාර Ghostface සිඩ්නිව විතරක් නෙවෙයි, ඇගේ මුළු පවුලම සහ දරුවන්ව ඉලක්ක කරමින් ඉතාමත් සූක්ෂම සැලසුමක නිරත වෙනවා. සිඩ්නිගේ අතීතයට සම්බන්ධ සැඟවුණු රහසක් මුල් කරගෙන, ඇයව මානසිකව වගේම කායිකවත් දඩයම් කරන්න සතුරා උත්සාහ කරන්නේ ඇයි? තමන්ගේ ලේ සබඳතා බේරාගන්න සිඩ්නිට මෙවර කරන්න වෙන මාරාන්තික සටන මොකක්ද? IMDb දර්ශකයේ 6.1ක සාධාරණ ප්රතිචාර ලබා ඇති, ස්ලෑෂර් (Slasher Horror) ගණයේ සිනමාපටවලට ආදරය කරන අය අනිවාර්යයෙන්ම නැරඹිය යුතු මේ අභිරහස් අපරාධ කතාවේ අවසාන හැරවුම කුමක්දැයි දැනගැනීමට ඔබටත් මේ අපූරු සිනමා නිර්මාණය නරඹන්න කියා ආරාධනා කරනවා.
