පාතාල කල්ලි අතරේ සිද්ධ වෙන දරුණු රණ්ඩුවක් මැද්දට කාල යන්ත්රයක් (Time Machine) ආවොත් මොන වගේ පිස්සුවක් වෙයිද? අන්න ඒ වගේ වෙනස්ම විදියේ අදහසක් තියෙන "Mike & Nick & Nick & Alice" කියන්නේ 2026 වසරේ මාර්තු මාසයේ තිරගත වුණු සුපිරි ඇක්ෂන් කොමඩි සයන්ස් ෆික්ෂන් චිත්රපටයක්. කතාව දිවෙන්නේ මයික් (James Marsden) සහ නික් (Vince Vaughn) කියන පාතාල කල්ලියක වැඩ කරන යාළුවෝ දෙන්නෙක් වටායි. මේ අතරේ මයික්, නික්ගේ බිරිඳ වෙන ඇලිස් (Eiza González) එක්ක හොර රහසේ සම්බන්ධයක් පටන් ගන්නවා. මේ සිදුවීම නික්ට මාට්ටු වුණාට පස්සේ, ඔහු කරන්නේ අමුතුම වැඩක්. නික් කාල යන්ත්රයක් පාවිච්චි කරලා මේ සම්බන්ධය පටන් ගන්න එක නවත්තන්න අතීතයට යනවා. හැබැයි අතීතයට ගියාට පස්සේ තමයි නියම පැටලැවිල්ල පටන් ගන්නේ. මොකද එතකොට අතීතයේ හිටපු නික් වගේම අනාගතයෙන් ආපු නික් කියලා එකම තැන නික්ලා දෙන්නෙක් මුණගැහෙනවා. මේ නික්ලා දෙන්නගේ පැටලැවිල්ලත් එක්ක පාතාල කල්ලියේ ලොක්කෙක්ගේ ලොකු සාදයක් (Party) අස්සේ සිද්ධ වෙන මහා කලබගෑනිය සහ පිස්සුව තමයි මුළු චිත්රපටය පුරාවටම බලාගන්න ලැබෙන්නේ. ජේම්ස් මාස්ඩන් සහ වින්ස් වෝන්ගේ දක්ෂ රංගනය වගේම එකිනෙකා අතර තියෙන දෙබස් හුවමාරුව නිසා මුල ඉඳන් අන්තිම වෙනකම්ම හොඳට හිනාවෙවී බලන්න පුළුවන්. කාල තරණය (Time Travel) වගේ සයන්ස් ෆික්ෂන් කොටස් වගේම මැර කල්ලි වල සිදුවීම් එකතු කරලා හදපු මේ කතාව, වෙනස්ම ආරක කොමඩි සිනමාපට රසවිඳින්න කැමති අයට එකදිගටම බලන්න පුළුවන් අපූරු නිර්මාණයක්.
