"Khajuraho Dreams" (2025) කියන්නේ කේරළයේ ඉඳන් මධ්ය ප්රදේශ් වල පිහිටි ඓතිහාසික කජුරාහෝ දේවාලය බලා බයිසිකල් සංචාරයක් යන තරුණ පිරිසක් වටා ගෙතුණු සුවිශේෂී මලයාලම් රෝඩ් ෆිල්ම් එකක්. කජුරාහෝ දේවාලය ගැන අහලා තියෙන කෙනෙක් දන්නවා ඒක 11 වන සියවසේ ඉදිකරපු, ලෝක ප්රසිද්ධ ශිලා මූර්ති සහ කැටයම් වලින් සමන්විත තැනක් කියලා. ඒත් මේ පිරිස මේ දුර බැහැර ගමන යන්නේ නිකම්ම සංචාරයකට විතරක් නෙවෙයි. කතාවට මුල පුරන්නේ දේවදාසි සංකල්පය සහ එය හා බැඳුණු අමුතු සිරිත් විරිත් ගැන තියෙන කටකතා වගයක්. කජුරාහෝ අවට තියෙන ගමක කාන්තාවන්ගේ විවාහ ජීවිත සති දෙකකට සීමා වෙන බවත්, ඉන්පසු ඔවුන් පාරම්පරික දේවදාසි වෘත්තියට යොමු වෙන බවත් කියැවෙන මේ අමුතු ජනප්රවාදය නිසා මේ තරුණයින් සිව්දෙනා සහ තරුණියක් ඒ පිළිබඳව සොයා යන්න පෙළඹෙනවා. ගමන පුරාවටම ඔවුන් මුහුණ දෙන අත්දැකීම් සහ අවසානයේ ඔවුන් බලාපොරොත්තු වුණු දේ සාක්ෂාත් කරගන්න පුළුවන්ද කියන කුතුහලය මුළු චිත්රපටය පුරාවටම පවත්වා ගන්නවා. මේ චිත්රපටයේ ප්රධාන චරිත සඳහා අර්ජුන් අශෝකන්, ශ්රීනාත් බාසි, ශරාෆ් යූ ඩීන්, ඩෘවන් සහ අදිටි රවි වැනි දක්ෂ නළු නිළියන් රැසක් රංගනයෙන් දායක වෙනවා. මනෝජ් වාසුදේව්ගේ අධ්යක්ෂණයෙන් එළියට ආපු මේ චිත්රපටය, සිනමාත්මක වශයෙන් මලයාලම් සිනමාවේ එන අනෙක් විශිෂ්ට රෝඩ් ට්රිප් චිත්රපට තරම් ඉහළ මට්ටමක නැති වුණත්, එහි තියෙන තේමාව සහ කතාවේ ගලායාම නිසා කම්මැලිකමක් නැතුව බලන්න පුළුවන් නිර්මාණයක්. කතාවේ තියෙන බරපතළ සහ අද්භූත අදහස් අතරින් පවා නිකම්ම සංචාරයක් විදියට කතාව ගලාගෙන ගියත්, මේ කතාව තව ටිකක් කොමඩි පැත්තට බර කළා නම් වඩාත් සාර්ථක වෙන්න තිබුණා කියලා නරඹන්නන්ට හැඟෙනු ඇති. කෙසේ වෙතත්, ඉන්දියාවේ නොයෙක් පළාත්වල තියෙන අමුතු සිරිත් විරිත් සහ සංචාරයකදී හමුවන අනපේක්ෂිත සිදුවීම් ගැන බලන්න කැමති කෙනෙක්ට මේ "Khajuraho Dreams" චිත්රපටය වෙනස්ම අත්දැකීමක් වේවි. තරුණ පිරිසකගේ මේ බයිසිකල් චාරිකාව ඔවුන්ව රැගෙන යන්නේ කුමන ආකාරයේ වික්රමයකටද යන්න දැනගන්න මේ චිත්රපටය නැරඹිය යුතුමයි.
