ලොව පුරා අතිශය ජනප්රිය වුණු ඇවටාර් සිනමා මාලාවේ තෙවැනි දිගහැරුම වන "Avatar: Fire and Ash" චිත්රපටය 2025 වසරේ අගභාගයේදී තිරගත වුණේ දැවැන්ත වාර්තා තබමිනි. ඩොලර් මිලියන 350ක අතිවිශාල පිරිවැයක් දරා නිපදවූ මෙම සිනමාපටය, මේ වන විටත් බොක්ස් ඔෆිස් වාර්තා බිඳ හෙළමින් ඩොලර් බිලියන 1.4කට වඩා උපයා ගැනීමට සමත්ව තිබේ. පැය 3යි විනාඩි 18ක් පුරා දිවෙන මෙම දැවැන්ත නිර්මාණය සඳහා සෑම් වර්තිංටන් (Sam Worthington), සෝවි සල්ඩන්යා (Zoe Saldaña), සිගෝර්නි වීවර් වගේම කේට් වින්ස්ලට් (Kate Winslet) ඇතුළු සුපුරුදු ප්රමුඛ පෙළේ හොලිවුඩ් නළු නිළියන් රැසක් රංගනයෙන් දායක වී ඇත. මෙවර කතාව ආරම්භ වන්නේ පෙර චිත්රපටයේ සිදුවූ තමන්ගේ වැඩිමහල් පුත්රයාගේ ඛේදනීය මරණය නිසා දැඩි ලෙස මානසිකව ඇද වැටී සිටින ජේක් සලී සහ නෙයිටිරි මුහුණ දෙන අලුත්ම අභියෝගයත් සමඟයි. හැබැයි මෙදා පාර ඔවුන්ට සටන් කරන්න සිදුවන්නේ පෘථිවියෙන් ආපු මිනිසුන් සමඟ විතරක් නෙවෙයි; පණ්ඩෝරා ග්රහලෝකයේම වෙසෙන, අනුකම්පාවක් නැති, බල ලෝභී වෙනත් නේවි (Na’vi) ගෝත්රයක් සමඟයි. "වරැන්ග්" (Varang) නැමැති රළු නායිකාවගේ මෙහෙයවීමෙන් පැමිණෙන මේ "Ash People" (අළු ගෝත්රිකයන්) නිසා ජේක්ගේ පවුලට වගේම මුළු පණ්ඩෝරාවේම වෙසෙන සෙසු සාමකාමී ගෝත්රයන්ට මාරාන්තික තර්ජනයක් එල්ල වෙනවා. තමන්ගේ ආදරණීයයන් වගේම මුළු පණ්ඩෝරා ලෝකයම බේරාගැනීම වෙනුවෙන් ජේක් සහ නෙයිටිරිට මෙතෙක් නොකළ විදියේ දරුණු සටනක නිරත වීමට මෙහිදී සිදුවේ. පෙර චිත්රපට මෙන්ම අතිවිශිෂ්ට දෘශ්ය ප්රයෝග (Visual Effects) සහ විශ්මිත මනඃකල්පිත ලෝකයක අත්දැකීම්වලින් පිරි මෙම සිනමාපටය, ඇවටාර් සිනමා විශ්වයට ඇලුම් කරන රසිකයන් අනිවාර්යයෙන්ම නැරඹිය යුතු මට්ටමේ ඉහළ සයන්ස් ෆික්ෂන් ඇඩ්වෙන්චර් නිර්මාණයකි.
