නීතිය ගැන හිතනවාට වඩා තමන්ගේම ස්ටයිල් එකකට වැඩ කරන, අපරාධකාරයන්ව කෙලින්ම අපායට යවන ජාතියේ අමුතුම පොලිස් නිලධාරියෙක් වටා ගෙතුණු ක්රියාදාම චිත්රපටයක් තමයි "Badass Ravi Kumar" කියන්නේ. 80 දශකයේ බොලිවුඩ් සිනමාවේ තිබුණු විදියේ දරුණු ෆයිට් සහ වේගවත් ගලායෑම ඒ විදිහටම ආයෙත් බලාගන්න කැමති අයට 2025 වසරේ තිරගත වුණු මේ හින්දි සිනමාපටය හොඳ තේරීමක් වෙයි. කතාව පැත්තට හැරුණොත්, මෙහි ඉන්න රවී කුමාර් කියන්නේ නිතරම නීතිය තමන්ගේ අතට ගන්න නිසාම හැමවෙලේම වැඩ තහනමට ලක්වෙන කෙනෙක්. ඔය අතරේ ඉන්දියාවේ අතිශය රහසිගත තොරතුරු ඇතුළත් "මයික්රෝ-රීල්" එකක් ජාත්යන්තර මාෆියා නායකයෙක් වෙන කාර්ලොස්ගේ අතට පත්වීමේ ලොකු අවදානමක් ඇති වෙනවා. ඉන්දීය පොලිසියට වගේම ඉන්ටර්පෝල් එකටත් මේක නවත්වන්න බැරි වුණාම, අවසානයේ මේ භයානක මෙහෙයුම බාර දෙන්නේ වැඩ තහනම් වෙලා ඉන්න රවී කුමාර්ටයි. මේ වෙනුවෙන් ඕමාන් රටට යන රවීට, පාතාලයේ ඉන්න දරුණුම මැරයන්ගේ රාජධානියටම තනියම ඇතුල් වෙන්න සිද්ධ වෙනවා. කාර්ලොස්, භුජාන්ග් සහ ජගාවාර් වගේ අපරාධකාරයෝ එක්ක හැප්පිලා, තමන්ගේ ආදරවන්තියත් බේරගෙන, අර රහස් රීල් එක ආපහු අරගන්න රවී කුමාර්ට පුළුවන් වෙයිද කියලා කතාව බලලම තමයි දැනගන්න වෙන්නේ. ලොකු තර්ක විතර්ක හොයන්නේ නැතුව, ලේ රත් වෙන විදියේ සටන් ජවනිකා සහ ලස්සන සින්දු අහන්න ආස කරන අයට කිසිම පාලුවක් නැතුව ගැම්මෙන් බලන්න පුළුවන් නිර්මාණයක්.
