යුද්ධය කියන්නේ කවදාවත් කාටවත් ජයග්රහණයක් අත්කර නොදෙන, සාමාන්ය අහිංසක මිනිසුන්ගේ ජීවිත සහ හීන අමුඅමුවේම බිලිගන්නා මහා ශාපයක්. ශ්රී ලාංකිකයන් වන අපට මේ කටුක යථාර්ථය සහ එහි බියකරු බව අමුතුවෙන් විස්තර කළ යුතු නැහැ. මීට දශක කිහිපයකට පෙර ලංකාවේ පැවති කුරිරු යුද වටපිටාව සහ ඉන්දීය සාම සාධක හමුදාවේ (IPKF) මැදිහත්වීම පසුබිම් කරගනිමින්, එක රැයකදී සිදුවන දැවැන්ත තිගැස්ම පිරි සිදුවීමක් තේමා කරගත්තු අලුත්ම සිනමා නිර්මාණයක් තමයි "Neelira" (A Long Night) කියන්නේ. පසුගිය 2026 අප්රේල් 3 වෙනිදා තිරගත වුණු, විනාඩි 92ක් පුරා දිවෙන මේ සලරුව Thriller සහ War ශානරයන් ඔස්සේ නිමවා ඇති අතර, එහි ඇති ප්රබල සහ තාත්වික කතා තේමාව නිසා IMDb දර්ශකයේ 8.7ක් වැනි අතිශය ඉහළ ප්රේක්ෂක අගයක් ලබාගැනීමට සමත් වී තිබෙනවා. කතාව පැත්තට හැරුණොත්, මුළු සිදුවීමම දිගහැරෙන්නේ 1988 වර්ෂයේ ශ්රී ලංකාවේ උතුරු පළාතේ පිහිටි එක්තරා කුඩා ගම්මානයකයි. එහි වසූකි නමැති දෙමළ තරුණියගේ විවාහ මංගල්යය වෙනුවෙන් පවුලේ සියලුදෙනාම ලෑස්ති වෙමින් සිටිනවා. යුද්ධයේ බිය සහ අනාරක්ෂිත බව නිසාම, කෙසේ හෝ මේ විවාහයෙන් පසු තමන්ගේ දරුවන්ව විදේශගත කර ආරක්ෂා කිරීමයි දෙමාපියන්ගේ එකම බලාපොරොත්තුව වෙලා තිබුණේ. නමුත් මේ සතුටුදායක වටපිටාව සම්පූර්ණයෙන්ම කණපිට පෙරලෙන්නේ, මඟ පෙන්වන සිතියමක සිදුවන වැරදීමක් නිසා මඟහැරී යන ඉන්දීය සාම සාධක හමුදාවේ (IPKF) සන්නද්ධ භට කණ්ඩායමක්, රැය පහන් වනතුරු ආරක්ෂාව පතා මේ මංගල නිවසට බලහත්කාරයෙන් කඩා වැදීමත් සමඟයි. අවාසනාවන්ත ලෙස, ඉන්දීය හමුදාව මේ නිවසේ රැඳී සිටින බව "කැස්ත්රෝ" (Castro) ඇතුළු එල්.ටී.ටී.ඊ සටන්කාමීන්ට සැලවීමත් සමඟ ඔවුන් වහාම ක්රියාත්මක වී මුළු නිවසම වටලනු ලබනවා. මෙතැන් සිට නිවසේ සිටින අහිංසක සිවිල් වැසියන් පිරිස, නිවස ඇතුළේ සිටින ඉන්දීය හමුදාවට සහ නිවසින් පිටත සිටින සටන්කාමීන්ට මැදිවී දෙපාර්ශවයේම "ප්රාණ ඇපකරුවන්" (Hostages) බවට පත්වෙනවා. එකම වහලක් යට කොටුවී, මරණයත් ජීවිතයත් අතර තත්පරයෙන් තත්පරය ගෙවී යන ඒ බිහිසුණු දීර්ඝ රාත්රිය තුළ, මේ අහිංසක පවුලේ සාමාජිකයන් තමන්ගේ ජීවිත බේරාගැනීමට කරන අතිශය සංවේදී මෙන්ම බුද්ධිමත් අරගලය සිනමාපටය පුරාම දැඩි කුතුහලයකින් යුතුව දිගහැරෙනවා. යුද්ධයේ කටුකත්වය සහ සන්නද්ධ කණ්ඩායම් දෙකක් මැද අසරණ වන සාමාන්ය වැසියන්ගේ සැබෑ ආත්ම ප්රකාශනයක් බඳු මෙම චිත්රපටය, සත්ය ඉතිහාසමය වටපිටාවන් ඇසුරින් නිර්මාණය වූ සලරූ නැරඹීමට ප්රිය කරන රසිකයන් අනිවාර්යයෙන්ම නැරඹිය යුතු උසස් ගණයේ නිර්මාණයකි.
