Kindred (2025) කියන්නේ 2025 අවුරුද්දේ තිරගත වුණු, Russ De Jong විසින් අධ්යක්ෂණය කරපු සහ John White විසින් තිර රචනය කරපු ඉංග්රීසි ත්රාසජනක (Thriller) චිත්රපටයක්. මෙහි ප්රධාන චරිත සඳහා Deanna Jarvis, Jonathan Goad සහ Kylee Evans රංගනයෙන් දායක වෙනවා. සාමාන්යයෙන් නිවසකට කඩා පනින සොරුන් සම්බන්ධ චිත්රපටවල දකින්න ලැබෙන්නේ නිවැසියන් අසරණ වෙන විදිහ වුණත්, මේ චිත්රපටය ඒ සංකල්පය සම්පූර්ණයෙන්ම කණපිට හරවන්න සමත් වෙලා තියෙනවා. කතාව පැත්තට හැරුණොත්, ඕකිඩ් කියන්නේ කලින් ධනවත් වයෝවෘද්ධ යුවළකට අයත් අතිවිශාල මන්දිරයක සේවිකාවක් විදිහට වැඩ කරපු තරුණියක්. මේ නිවසේ සේප්පුවේ වටිනා මිල අධික ලියකියවිලි (Bearer Bonds) තියෙන බව දන්නා නිසා, ඇය තමන්ගේ සහකරුවාත් එක්ක රාත්රියක මේ මන්දිරයට හොර රහසේ ඇතුළු වෙනවා. ඔවුන්ගේ එකම අරමුණ වෙන්නේ මේවා සොරකම් කරලා ලේසියෙන්ම පැනලා යන එකයි. ඒත් නිවසට ඇතුළු වුණාට පස්සේ ඔවුන්ට තේරෙනවා මේක සිතුවා තරම් ලේසි වැඩක් නෙවෙයි කියලා. මන්දිරයේ අයිතිකරුවන් වන කොන්රඩ් සහ එතල් කියන්නේ සාමාන්ය වයසක යුවළක් නෙවෙයි. ඔවුන් තමන්ගේ ප්රභූ පෙනුමට මුවා වෙලා අතිශය අඳුරු සහ ම්ලේච්ඡ රහස් හංගගෙන ඉන්න භයානක දෙන්නෙක්. ඔවුන්ගේ ප්රධාන විනෝදාංශය වෙන්නේ නිවසට පැමිණෙන අමුත්තන්ට විෂ මුසු කරපු වයින් ලබා දීලා ඔවුන්ව අඩපණ කරන එකයි. මේ නිසා සොරකම් කරන්න ආපු සොරුන් දෙදෙනාට අවසානයේදී සිද්ධ වෙන්නේ තමන්ගේම ජීවිතය බේරාගැනීම වෙනුවෙන් මාරාන්තික සටනක නිරත වෙන්නයි.
