මහා වනාන්තරයක් කියන්නේ අලංකාර වගේම ඕනෑම මොහොතක මාරාන්තික අනතුරක් ළඟා කරලා දෙන්න පුළුවන් අද්භූත තැනක්. දමිළ සිනමාවේ වෙනස්ම විදියේ අභියෝගාත්මක චරිත තෝරාගන්න දක්ෂ නිළි ඇන්ඩ්රියා ජෙරමියා (Andrea Jeremiah) ප්රධාන චරිතයට පණ පොවන "Kaa - The Forest" චිත්රපටයෙන් අපිට දැකබලාගන්න ලැබෙන්නේ අන්න ඒ වගේ බියකරු වනාන්තරයක් ඇතුළේ සිද්ධ වෙන මාරාන්තික සර්වයිවල් (Survival) අත්දැකීමක්. නන්ජිල්ගේ අධ්යක්ෂණයෙන් වගේම ප්රවීණ නළු සලීම් ගවුස්ගේ ප්රබල රංගනයෙන් හැඩවුණු මේ සිනමාපටය, පසුගිය පෙබරවාරි මාසයේදී තිරගත වෙලා IMDb දර්ශකයේ 7.3ක වැනි ඉතාමත් හොඳ ප්රේක්ෂක ප්රතිචාරයක් ලබාගන්න සමත් වෙලා තියෙනවා. චිත්රපටයේ මුල්ම පදනම වැටෙන්නේ 1980 වර්ෂයේ සිදුවුණු ඛේදවාචකයකින්. තමන්ගේ ආදරය ප්රතික්ෂේප කරපු මයිතිලි නැමැති රූමත් තරුණියකව එක්තරා තරුණයෙක් විසින් කුරිරු ලෙස ඝාතනය කරන සිදුවීමකින් පස්සේ, කතාව වර්තමාන කාලයට මාරු වෙනවා. වර්තමානයේදී ෆේස්බුක්, ටික්ටොක් වැනි සමාජ මාධ්ය හරහා රටේ පාලකයන්ට සහ දේශපාලන අධිකාරියට විරුද්ධව දැඩි ලෙස හඬ නඟන තරුණයන් තිදෙනෙක්ව සහමුලින්ම නිහඬ කිරීමේ රහසිගත කොන්ත්රාත්තුවක් "වික්ටර් මහාදේවන්" නැමැති දරුණු පාතාල මැරයෙකුට පැවරෙනවා. ඔහු මේ තරුණයන්ව කිසිවෙකුට සොයාගත නොහැකි මහා ඝන වනාන්තරයක් ඇතුළට පැහැරගෙන යන්නේ කිසිදු හෝඩුවාවක් නැතිව ඔවුන්ව විනාශ කර දමන්නයි. ඔය අතරේ මතී නැමැති තරමක් බියගුලු තරුණයෙක් අලුතින්ම අඩවි වන කාර්යාලයට සේවයට එකතු වෙනවා. එහි සිටින දක්ෂ වනජීවී ඡායාරූප ශිල්පිනියක වන වෙන්බා (ඇන්ඩ්රියා) සමඟ මතී දවසක් වනයේ අභ්යන්තරයට යන්නේ ඉතාමත් දුර්ලභ ගණයේ සත්ව දර්ශන කිහිපයක් කැමරාගත කරගැනීමේ බලාපොරොත්තුවෙන්. හැබැයි අවාසනාවකට වගේ ඔවුන් දෙන්නට අහම්බෙන් දැකගන්න ලැබෙන්නේ අර වික්ටර් මහාදේවන් සහ ඔහුගේ මැර කල්ලිය විසින් අර අහිංසක තරුණයන්ව ඝාතනය කරන්න සැරසෙන අතිශය බියකරු අපරාධයයි. අපරාධය ඇස් දෙකටම දැකපු මේ දෙන්නව දඩයම් කරන්න මැර කල්ලිය පස්සෙන් පන්නන්න පටන් ගැනීමත් සමඟ කතාවේ ත්රාසය උපරිම මට්ටමකට ළඟා වෙනවා. වනාන්තරයේ ඇති කටුක වටපිටාව, තමන්ගේම සහජ බුද්ධිය, දරාගැනීමේ ශක්තිය සහ වාසනාව මත පමණක් ජීවිතය රැකගන්න සිද්ධ වෙන මේ මාරාන්තික හඹායාම මිනිත්තු ගණනාවක් පුරාවටම ඉතාමත් තාත්විකව නිරූපණය කරලා තියෙනවා. සුන්දර් සී. බාබුගේ (Sundar C. Babu) ගැළපෙන පසුබිම් සංගීතයත් සමඟ තත්පරයෙන් තත්පරය හුස්ම හිරවන විදියේ අත්දැකීමක් විඳගන්න කැමති සිනමාලෝලීන්ට, වනයේ සැඟවුණු ම්ලේච්ඡත්වය සහ මිනිස් තිරිසන්කම අතර ඇතිවෙන මේ සටන එක හුස්මට බලාගන්න පුළුවන්.
