යූටියුබ් අවකාශයේ චිත්රපට විචාරකයෙක් විදිහට අතිශය ජනප්රිය වුණු ක්රිස් ස්ටක්මන් (Chris Stuckmann) ගේ පළමු සිනමා අධ්යක්ෂණය වන “Shelby Oaks” (2025), හොරර් සහ මිස්ට්රි ශානරයන්ට ලැදි රසිකයන් මඟනොහැරිය යුතු වෙනස්ම ආරක සිනමාපටයකි. සාමාන්ය හොරර් රටාවන්ගෙන් මිදී, සත්ය ලෙසම සිදු වූවක් යැයි හැඟවෙන "Found Footage" දර්ශන කලවම් කරමින් මේ නිර්මාණය ප්රේක්ෂකයා වෙත රැගෙන එන්නේ දැඩි තිගැස්මකි. වසර 12ක අභිරහස සහ අතුරුදන් වූ ගවේෂකයෝ කතාව ආරම්භ වෙන්නේ අද්භූත සහ භූත බලවේගයන් ගැන සජීවීව ගවේෂණය කරන (Paranormal Investigators) තරුණ කණ්ඩායමකිනි. එක්තරා රූගත කිරීමක් අතරතුර මේ කණ්ඩායමේ සිටි රයිලි (Riley) නැමැති තරුණිය ඇතුළු පිරිස කිසිදු හෝඩුවාවක් නැතිව අභිරහස් ලෙස අතුරුදන් වෙයි. වසර 12ක් යනතුරුත් ඔවුන් ගැන කිසිදු තොරතුරක් ලැබෙන්නේ නැත. නමුත් රයිලිගේ සහෝදරිය වන ටීයා (Camille Sullivan), තමන්ගේ අක්කාට සිදු වූයේ කුමක්දැයි සෙවීම කිසිවිටෙකත් නතර කරන්නේ නැත. කාලයකට පසු ඇයට හමුවන පැරණි වීඩියෝ දර්ශන පෙළක් නිසා මුළු විමර්ශනයම කණපිට පෙරළෙයි. මෙය හුදෙක් මිනිස් පැහැරගැනීමක් නොව, ඒ පිටුපස මහා අඳුරු, අදෘශ්යමාන සහ බියකරු බලවේගයක් ක්රියාත්මක වන බව ටීයාට වැටහෙන්නට ගන්නේ එතැන් සිටයි. චිත්රපටයේ කැපී පෙනෙන පැති: තාත්වික රංගනය: මුළු චිත්රපටයේම බර තනිවම කරට ගන්නා කැමිල් සුලිවන්, සහෝදරියකගේ වියෝවෙන් තැවෙන මෙන්ම සත්යය හමුවේ භීතියට පත්වන තරුණියකගේ චරිතය උපරිම තාත්විකත්වයෙන් නිරූපණය කරයි. බ්රෙන්ඩන් සෙක්ස්ටන් සහ මයිකල් බීච්ගේ රංගනයද මෙයට මනා සහයෝගයක් දෙයි. The Blair Witch ආභාෂය: 'Found Footage' ශෛලිය (ඇත්තටම කැමරාවල පටිගත වුණු දර්ශන වැනි ස්වභාවය) නිසා ප්රේක්ෂකයාටද මේ අභිරහස ඇතුළේම තමන්ද සැරිසරනවා වැනි සජීවී හැඟීමක් දැනේ. නොසිතූ අවසානය: සාම්ප්රදායික හොරර් අවසානයන් මෙන් නොව, චිත්රපටය නිමා වන විට ප්රේක්ෂකයා සම්පූර්ණයෙන්ම මවිතයට පත් කරවන අපූරු හැරවුමක් (Twist) මෙහි අඩංගුය. මිනිත්තු 91ක් පුරා දිවෙන "Shelby Oaks", අනවශ්ය ලේ වැගිරීම්වලින් තොරව සැබෑ මනෝවිද්යාත්මක භීතියක් සහ අද්භූත කුතුහලයක් විඳගැනීමට කැමති රසිකයන්ට කදිම සිනමා අත්දැකීමකි.
