අපේ ලංකාවේ ඝන කැලෑවල් සහ ගංගා ආශ්රිත පරිසරයට සෑහෙන දුරට සමාන, ගිනිකොණදිග ආසියාවේ මහා වනාන්තරයක් ඇතුළේ සිද්ධ වෙන බිහිසුණුම දිවි බේරාගැනීමේ (Survival) සටනක් තමයි "River of Blood" චිත්රපටයෙන් දිගහැරෙන්නේ. 2024 වසරේ අගභාගයේදී නිකුත් වුණු මේ හොරර් ත්රිලර් නිර්මාණය, මිනිත්තු 86ක් පුරාවට ප්රේක්ෂකයාව දැඩි තිගැස්මකට වගේම නොසන්සුන් භාවයකට ලක් කිරීමට සමත්. කතාව ආරම්භ වෙන්නේ තමන්ගේ සමාගම විකුණලා විශාල මුදලක් උපයාගත් රිචී (Richie), ඔහුගේ සහකාරිය ඇතුළු මිතුරන් වන ජැස්මින්, මායා සහ ඒ.ජේ සමඟ ගිනිකොණදිග ආසියාවේ නිවාඩුවක් ගත කිරීමට පැමිණීමත් සමඟයි. එහිදී ඔවුන්ට ඇතිවන ක්ෂණික ආසාවකට අනුව, සාමාන්ය සංචාරකයන් නොයන ඝන වනාන්තරයක් ඇතුළට ගවේෂණයක යන්න ඔවුන් තීරණය කරනවා. මේ අවදානම් සහගත ගමනේදී ඔවුන්ගේ මඟපෙන්වන්නා (Tour Guide) ලෙස එකතු වෙන්නේ නික් (Nick). නික්ගේ පරම්පරාවම මේ වනාන්තරය ආශ්රිතව ජීවත් වූ අය වන අතර, ඔහුගේ මුතුන්මිත්තන් මේ කැලයට පැමිණි මුල්ම පිටස්තරයන්ගෙන් කෙනෙක්. ඒ නිසාම මේ මහා වනාන්තරයේ තියෙන අද්භූත වගේම බියකරු ස්වභාවය ගැන නික් හොඳින්ම දැනුවත්ව සිටිනවා. සංචාරක පිරිස මේ කැලෑවට ඇතුළු වීමත් සමඟම ඔවුන්ගේ ලස්සන නිවාඩුව බියකරු හීනයක් බවට පත්වෙන්නේ ඔවුන් කිසිවෙකුත් නොසිතූ විදිහට මේ කැලෑව ඇතුළේ ජීවත් වන මිනිස් මස් අනුභව කරන (Cannibalistic) ඉතාමත් ම්ලේච්ඡ, පැරණි ගෝත්රික පිරිසකට කොටු වීම නිසයි. කැලෑවට ඇතුළු වන පිටස්තර මිනිසුන්ව අමානුෂික ලෙස වදහිංසා පමුණුවා මරාදමන මේ භයානක ගෝත්රය ගැන නික් අසා තිබුණත්, ඔහු එය මීට පෙර තමන්ගේ දෑසින් දැක තිබුණේ නැහැ. සාමකාමීව විනෝද වෙන්න ආපු මේ තරුණ පිරිසට, මේ මිනීකන්නන්ගේ ග්රහණයෙන් බේරී තමන්ගේ ජීවිත ආරක්ෂා කරගැනීමට පුළුවන් වෙයිද? වනාන්තරයේ දරුණු පරිසරයත්, මේ ම්ලේච්ඡයන්ගේ අනුකම්පාවක් නැති දඩයමත් මැද මේ පස්දෙනාගෙන් අවසානයට පණ පිටින් ලෝකයට පය තබන්නේ කවුද යන්න මුල සිට අගටම ලොකු කුතුහලයකින් මෙයින් බලාගත හැකියි. ඩෙන්මාර්ක නිෂ්පාදනයක් වන මේ චිත්රපටය, "Wrong Turn" හෝ "The Green Inferno" වැනි වනාන්තරගත මිනීකන්නන්ගෙන් බේරී පලායන බියකරු සිනමාපට නැරඹීමට කැමති රසිකයන්ට කදිම තේරීමක්.
