අපේ ළමා කාලයේ ලස්සනම මතකයක් වුණු හැරී පොටර් මායා ලෝකය HBO Max හරහා නැවතත් අලුත්ම විදියකට නිර්මාණය වෙනවා. ඉතින් ඒ අලුත් නිර්මාණය පිටුපස තියෙන පුදුමාකාර මහන්සිය සහ රහස් එකතු කරලා හදපු කෙටි වාර්තා වැඩසටහනක් තමයි "Finding Harry: The Craft Behind the Magic" කියන්නේ. විනාඩි 26ක් වැනි කෙටි කාලයක් දිවෙන මේ නිර්මාණයෙන් හැරී පොටර් රසිකයන්ට තමන්ගේ අතීතය ආයෙමත් මතක් කරලා දෙනවා. මුල්ම චිත්රපට ආපු කාලයේ ඉඳන් ඒ ලෝකෙට පිස්සුවෙන් වගේ ආදරය කරපු අයට මේ වගේ අලුත් නිර්මාණයක් (Remake) එනවා කියද්දී පොඩි බයක් ඇති වෙන එක සාමාන්යයි. හැබැයි මේ වාර්තා වැඩසටහන බලද්දී ඒ බය සම්පූර්ණයෙන්ම නැති වෙලා යනවා. මොකද මේක පිටුපස ඉන්න නිර්මාණකරුවෝ හැරී පොටර් ලෝකයට කොයි තරම් ආදරේද සහ ඒ වෙනුවෙන් කොච්චර කැපවීමක් කරනවාද කියලා මේකෙන් පැහැදිලිවම පෙන්වනවා. මේකේ තියෙන විශේෂම දේ තමයි අලුත් නිර්මාණය සඳහා හැරී, රොන් සහ හර්මයිනිව තෝරාගන්න දහස් ගණනක් ළමයි අතරින් කරපු අසීරු සෝදිසිය වගේම, හැමදේම තාත්විකව කරන්න එයාලා ගන්න උත්සාහයයි. බස්සන්ගේ ඇඟේ පිහාටු 36,000ක් එකින් එක අලවලා උන්ට පණ දෙන විදිහ, මහා ශාලාව (Great Hall) ආයෙමත් මුල ඉඳන්ම ගොඩනගන හැටි දකිද්දී පුදුම හිතෙනවා. ඒ වගේම, එදා මුල්ම චිත්රපටියේ ක්විඩිච් පෙට්ටිය හදපු කෙනාගේ පුතා තමයි අද මේ අලුත් එකේ වැඩ කටයුතු වලට එකතු වෙලා තියෙන්නේ. ඒක හරියට පරම්පරාවෙන් ආපු බැඳීමක් වගේ. 1991 අවුරුද්දේ පරිසරය, ඩයගන් ඇලී, ලීකි කෝල්ඩ්රන් වගේ අපිට හුරුපුරුදු හැම තැනක්ම වඩාත් යථාර්ථවාදී විදිහට ආයෙමත් මේ කතාමාලාවෙන් අපිට බලාගන්න පුළුවන් වෙනවා. ලබන නත්තල් කාලයේදී රිලීස් වෙන්න තියෙන අලුත් හැරී පොටර් කතාමාලාව එනකම් බලාගෙන ඉන්න රසිකයන්ට, ඒ මායාව ආයෙමත් හදවතටම දැනෙන්න සලස්වන, අනිවාර්යයෙන්ම නැරඹිය යුතු අපූරු කෙටි වැඩසටහනක්.