සමාජයේ තියෙන අන්ධ විශ්වාසයන්ට අභියෝග කරලා ඒවායේ සැබෑ තත්ත්වය හෙළිදරව් කරන්න යන යාළුවෝ හතර දෙනෙකුට මුහුණ දෙන්න වෙන අද්භූත සිදුවීමක් වටා ගෙතුණු තෙලිඟු සිනමා නිර්මාණයක් තමයි "Eesha" කියන්නේ. 2025 වසරේ දෙසැම්බර් මස අග හරියේදී (දෙසැම්බර් 25) තිරගත වීම ආරම්භ කළ මේ චිත්රපටය හොරර් ත්රිලර් (Horror Thriller) ගණයට අයත් එකක්. කතාව පැත්තට හැරුණොත්, මෙහි ඉන්න යාළුවෝ හතර දෙනාගේ ප්රධානම කාර්යය වෙන්නේ සමාජයේ මුල් බැසගෙන තියෙන විවිධ අන්ධ විශ්වාසයන් සහ මිථ්යාවන් බොරු කියලා ඔප්පු කරලා, ඒවායේ ඇත්ත නැත්ත ලෝකයටම හෙළිදරව් කරන එකයි. මේ අපූරු වැඩේ නිසාම ඔවුන් කෙටි කාලයකින් සමාජ මාධ්ය ඔස්සේ ලොකු ජනප්රියත්වයක් වගේම ප්රේක්ෂක ආකර්ෂණයක් දිනාගන්න සමත් වෙනවා. හැබැයි ඔහොම කාලයක් යද්දී මේ යාළුවෝ හතරදෙනා එකට යන ගමනකදී ඉතාමත් දරුණු අනතුරකට මුහුණ දෙනවා. චිත්රපටයේ තියෙන ලොකුම අභිරහස සහ කුතුහලය පටන් ගන්නේ මෙන්න මේ අනතුරෙන් පස්සෙයි. මේ අනතුර නිසා ඇත්තටම ඔවුන් මියගියාද, නැත්නම් ඔවුන් තවමත් පණ පිටින් ඉන්නවාද? ඔවුන් මුහුණ දුන්නේ සාමාන්ය අනතුරකටද නැත්නම් ඔවුන් අභියෝග කරපු අදෘශ්යමාන බලවේගයක පළිගැනීමකටද? කියන ප්රශ්න වැලට උත්තර සොයාගෙන තමයි කතාව ඉදිරියට ගලාගෙන යන්නේ. ශ්රීනිවාස් මන්නේ (Srinivas Manne) විසින් අධ්යක්ෂණය සහ තිර රචනය කළ මේ චිත්රපටයේ ත්රිගන් (Thrigun), හේබා පටෙල් (Hebah Patel), අඛිල් රාජ් සහ බබ්ලු ප්රීත්විරාජ් ඇතුළු පිරිසක් රංගනයෙන් දායක වෙනවා. ආදි සායිකුමාර් ප්රධාන චරිතය රඟපෑ "Shambhala: A Mystical World" චිත්රපටය නිකුත් වුණු දවසේම තිරගත වීම ආරම්භ කළ මේ නිර්මාණය, ඉන්දීය රුපියල් කෝටි 9.50ක බොක්ස් ඔෆිස් ආදායමක් උපයා ගැනීමට සමත් වුණා. මේ වෙනකොට ඇමේසන් ප්රයිම් (Amazon Prime Video) හරහාත් නැරඹීමේ හැකියාව තියෙන මේ චිත්රපටය, අද්භූත සිදුවීම් වගේම අවසානය වෙනකම්ම කුතුහලය පිරුණු හොරර් කතා බලන්න කැමති අයට එකදිගටම බලා සිටිය හැකි නිර්මාණයක්.
